Rhoi

Môr yw bron hanner tiriogaeth Cymru, gyda bron 15,000km² o’r dyfroedd glannau yn cefnogi bywyd gwyllt, cymunedau arfordirol a rhannau mawr o economi Cymru.

Mae oddeutu 60% o’r boblogaeth yn byw neu’n gweithio ar bwys yr arfordir, gan ddibynnu ar ecosystemau morol ac arfordirol iach am fwyd, swyddi, trafnidiaeth, hamdden ac amddiffyniad rhag stormydd ac erydu.

Cymru hefyd sydd ag un o’r rhwydweithiau ehangaf o Ardaloedd Gwarchodedig Morol yn y DU, yn ymestyn dros 69% o ddyfroedd ei glannau. Mae’r ecosystemau hyn yn storio carbon, yn cefnogi bioamrywiaeth ac yn darparu asedau naturiol sy’n cynnal economi las Cymru. Mae buddsoddiad hirdymor yn hanfodol i ddiogelu a chryfhau’r buddion hyn ar gyfer cenedlaethau’r dyfodol.

Mae’r newid yn yr hinsawdd, colli cynefinoedd a’r galw cynyddol am fannau morol yn rhoi arfordiroedd a moroedd Cymru o dan fwyfwy o bwysau.

Er bod polisïau a rheoliadau yn gosod y cyfeiriad, mae angen buddsoddiad hirdymor i droi uchelgais yn weithredu ymarferol. Crewyd Cronfa MARINE Cymru i ddenu cyfraniadau gwirfoddol a’u cyfeirio at brosiectau sydd wedi’u cynllunio’n dda sy’n cryfhau iechyd a gwydnwch ecosystemau morol ac arfordirol ledled Cymru.